नवीन आर्थिक वर्षाची सुरूवात करताना या ५ गोष्टींकडे द्या लक्ष

■आर्थिक व्यवस्थापनाच्या बाबतीत गेली दोन वर्षे लोकांसाठी कठीण ठरली आहेत. लॉकडाऊन, पगार कपात, व्यवसाय बंद आणि वैद्यकीय खर्चासह महामारीच्या प्रादुर्भावाच्या कारणास्तव उद्भवलेल्या अभूतपूर्व परिस्थितीमुळे देशातील प्रत्येक व्यक्तीला आर्थिक फटका बसला आहे. पण, गेल्या दोन वर्षांत आर्थिक नियोजनचे महत्त्वही लोकांना कळून चुकले आहे. आणि ते करण्यासाठी नवीन आर्थिक वर्षाच्या सुरुवातीपेक्षा चांगली वेळ नाही.


      एखादी व्यक्ती विचारू शकते की, वर्षातून याच वेळेला का? खरेतर, नवीन आर्थिक वर्ष म्हणजे मागील वर्षाच्या आर्थिक ध्येयांचे पुनरावलोकन करणे आणि आर्थिक स्थिरता व अनिश्चितच काळासाठी सुरक्षिततेच्या खात्रीसाठी अधिक ठोस योजना तयार करणे. वर्षभर आर्थिक तणाव होऊ नये यासाठी एंजेल वन लिमिटेडचे इक्विटी स्ट्रॅटजिस्ट श्री ज्योती रॉय यांनी काही महत्वपूर्ण बाबी सांगितल्या आहेत ज्या तुम्‍ही नवीन आर्थिक वर्षाच्या सुरूवातीला केल्या पाहिजेत.

     

     खर्चांवर नियंत्रण ठेवा: तुम्ही यापूर्वी कधीच आर्थिक नियोजन केले नसेल तर खर्चांवर नियंत्रण ठेवणे हे स्मार्ट आर्थिक नियोजनाच्या दिशेने सर्वोत्तम पहिले पाऊल आहे. तुम्ही कुठे व किती खर्च करत आहात हे माहित असेल तर तुम्हाला बचत कुठे करावी हे देखील समजेल. खर्चांवर नियंत्रण ठेवण्यासाठी तुम्ही खर्च व्यवस्थापन अॅप्सची मदत घेऊ शकतात, ज्यामध्ये तुमच्या सर्व व्यवहारांची नोंद करता येईल. असे करत तुम्ही तुमच्या खर्चांचे उत्तमरित्या पुनरावलोकन कराल आणि त्याअनुषंगाने खर्च कराल.


     पण तुम्ही अगोदरपासनूच तुमच्या खर्चांवर नियंत्रण ठेवत असाल तर तुम्हाला काय करायचे आहे हे माहित असणार. नवीन वर्षासाठी आर्थिक नियोजन उत्तमरित्या समजण्यासाठी बसा आणि खर्चांचे पुनरावलोकन करा.


    ध्येयांचे पुनरावलोकन: पुढील पायरी म्हणजे तुमच्या आर्थिक ध्येयांचे पुनरावलोकन करा. प्रत्येक व्यक्ती त्याच्या वेतनामधून काही रक्कम विशिष्ट ध्येयांसह बचत, गुंतवणूक इत्यादींसाठी वेगळी ठेवतात. नवीन आर्थिक वर्ष सुरू होताच तुम्ही पुन्हा एकदा या ध्येयांकडे लक्ष देऊ शकता आणि नवीन वर्षासाठी नवीन लक्ष्यांची भर करू शकता. उदाहरणार्थ, तुम्ही १० वर्षांनंतर घर खरेदी करण्याचे नियोजन करत होतात, पण वाढत्या उत्पन्नासह तुम्ही लवकरच हे ध्येय साध्य करू शकाल. म्हणून तुम्ही घर खरेदी करण्यासाठी बचत करणा-या मासिक रक्कमेमध्ये वाढ करू शकता.


    गुंतवणूक पोर्टफोलिओचे पुनरावलोकन: तुम्ही गुंतवणूक करत नसाल तर गुंतवणूकीला सुरूवात करून प्रबळ गुंतवणूक पोर्टफालिओ निर्माण करण्याची ही उत्तम वेळ आहे. तुमचा गुंतवणूक पोर्टफोलिओ असेल तर तुम्ही त्याचे पुनरावलोकन करू शकता. नियमित कालांतराने पुनरावलोकन केल्यास तुम्हाला फंड्स कोणते आहेत, तुमच्या गुंतवणूकीची कामगिरी समजण्यास मदत होईल. 


       काही अडथळे असल्यास त्‍यांना दूर करणे सर्वोत्तम निर्णय आहे, पण त्यासंदर्भात सावधगिरी बाळगणे गरजेचे आहे. अशा स्थितीमध्ये तुम्ही एक वर्षाहून अधिक काळापर्यंत योग्य कामगिरी करत नसलेल्या फंड्सबाबत पुनर्विचार केला पाहिजे. पण तुम्ही योग्य कामगिरी होत नसण्यासंदर्भात संपूर्ण माहिती देखील जाणून घेतली पाहिजे.


      विमांचे पुनरावलोकन: लोक विमा संरक्षणाकडे गांभीर्याने पाहत नाहीत, पण आपत्ती काळामध्ये त्यांची उत्तम मदत होते. प्रत्येक व्यक्तीसाठी, विशेषत: तो/ती कुटुंबामधील कमावती व्यक्ती असेल तर अशा व्यक्तींसाठी आरोग्य विमा व जीवन विमा महत्त्वाचे आहेत. म्हणून तुमच्या विमांची मुदत संपत आली असेल तर त्यांचे नूतनीकरण करा. तसेच नुकतेच विवाह किंवा बाळाच्या जन्मामुळे कुटुंबाच्या सदस्यांमध्ये वाढ झाली असेल तर विमांमध्ये सुधारणा करणे महत्त्वाचे आहे.

   

      कर नियोजन: आर्थिक नियोजनाचा सर्वात महत्त्वपूर्ण भाग म्हणजे कर नियोजन. तुम्ही आर्थिक वर्षाच्या सुरूवातीला कर नियोजनाची सुरूवात केली तर याचा अर्थ असा की, तुमच्याकडे गुंतवणूकांचे गणन करण्यासाठी आणि कराच्या अधिकतम रक्कमेची बचत करण्यासाठी पुरेसा वेळ आहे. तुम्ही वर्षभरात या गुंतवणूका वाढवू शकता.

Post a Comment

0 Comments