राष्ट्र कल्याण पार्टीच्या वतीने प्रॉपर्टी कार्डबाबत जनजागृती

 

कल्याण , कुणाल  म्हात्रे  :  कल्याण डोंबिवलीमध्ये अनेक नागरिकांच्या हक्काच्या प्रॉपर्टीवर अनधिकृत बांधकामाचा शिक्का असून हा अनधिकृततेचा शिक्का दूर करण्यासाठी प्रॉपर्टी कार्ड आवश्यक असून या प्रॉपर्टी कार्ड बाबत राष्ट्र कल्याण पार्टीच्या वतीने कल्याण डोंबिवलीकरांमध्ये जनजागृती केली जात आहे. राष्ट्र कल्याण पार्टीचे महासचिव राहुल काटकर यांच्या माध्यमातून नागरिकांना प्रॉपर्टी कार्ड म्हणजे काय याबाबत मार्गदर्शन केले जात आहे.

       वर्षानुवर्षे राहत असलेल्या कल्याण डोंबिवलीतील नागरिकांच्या हक्काच्या प्रॉपर्टीवर अनधिकृत बांधकामाचा शिक्का आहे. हा अनधिकृततेच शिक्का दूर करण्यासाठी प्रॉपर्टी कार्ड आवश्यक आहे. नागरिकांना याबाबत पुरेसे ज्ञान नसल्याने अनेकवेळा अनधिकृत बांधकाम म्हणून होणाऱ्या कारवाईला सामोरे जावे लागते. प्रॉपर्टी कार्ड म्हणजे मालकी हक्काचा प्रथमदर्शनी पुरावा असून कोणत्याही नैसर्गिक संकट व विकास योजनांच्या वेळी शासकीय मोबदला मिळविण्यासाठी प्रॉपर्टीच्या हक्काचा पुरावा आहे. जागा पुर्नविकासामध्ये गेल्यास त्याचा मो बदला मिळणे सहज शक्य होते.

       सामुहिक विकास योजनेत होणारी फसवणूक प्रॉपर्टी कार्डमुळे टाळता येते. कोणत्याही खाजगी किंवा राष्ट्रीयकृत बँकेतून सुलभ कर्जाची हमी प्रॉपर्टी कार्डमुळे मिळते. खरेदी विक्रीच्या व्यवहारात फसवणूक टाळण्यासाठी प्रॉपर्टी कार्ड अत्यंत उपयुक्त असल्याने नागरिकांनी आपले प्रॉपर्टी कार्ड बनवून घेण्याचे आवाहन राहुल काटकर यांनी केले आहे. राष्ट्र कल्याण पार्टीच्या वतीने आठवडाभर हि जनजागृती मोहीम राबविण्यात येणार असून ज्या नागरिकांना प्रॉपर्टी कार्ड संदर्भात माहिती पाहिजे असल्यास त्यांनी आकाश कॉंप्लेक्स, श्रीराम टॉकीजच्या मागे विठ्ठलवाडी, कल्याण पूर्व याठिकाणी सकाळी १० ते सायंकाळी ७ पर्यंत संपर्क करण्याचे आवाहन करण्यात आले आहे.