Header AD

प्राथमिक शिक्षकांचे प्रश्न लवकरच मार्गी, शालेयमंत्री आशिष शेलार यांचे आश्वासन


 न्यूज१ मराठी । नेटवर्क 

आ.संजय केळकर यांच्या नेतृत्वाखालील शिष्टमंडळाशी चर्चा

प्राथमिक शिक्षकांचे प्रश्न लवकरच मार्गी, शालेयमंत्री आशिष शेलार यांचे आश्वासन

वेतनश्रेणीपासून पदोन्नती, अनुदान, स्वच्छतागृहे आदी मागण्या धसास लावण्यासाठी महाराष्ट्र राज्य शिक्षक परिषदेच्या शिष्टमंडळाने आ. संजय केळकर यांच्या नेतृत्वाखाली शालेय शिक्षणमंत्री आशिष शेलार यांची भेट घेऊन चर्चा केली. हे प्रश्न लवकरच मार्गी लावू, असे आश्वासन शालेय मंत्री आशिष शेलार यांनी यावेळी दिले. शुक्रवारी झालेल्या या भेटीत परिषदेच्या प्राथमिक विभागाच्या वतीने  नूतन शालेय शिक्षणमंत्री आशिष शेलार यांची भेट घेऊन त्यांचे अभिनंदन करण्यात आले. यावेळी महाराष्ट्र राज्यातील प्राथमिक शिक्षकांच्या विविध प्रश्नांबाबत निवेदन देऊन चर्चा करण्यात आली.

वरिष्ठ वेतनश्रेणी व निवड श्रेणीसाठी शासन निर्णय 23/10 प्रमाणे शाळा ही ’शाळा सिद्धी’ या उपक्रमात ’अ’ श्रेणीतच असायला हवी, ही अन्यायकारक अट तात्काळ रद्द करावी तसेच सरसकट वरीष्ठ वेतनश्रेणी व निवडश्रेणी संबंधित कालावधी पूर्ण केलेल्या व नियमात बसणार्‍या सर्व शिक्षकांना देण्याची मागणी करण्यात आली. राज्यभरात जिल्हापरिषद व महानगरपालिका तसेच नगरपालिका शाळांतील मुलींच्या स्वच्छतागृहांची दुरवस्था झाली असून त्यांची दुरुस्ती व देखभाल करण्यासाठी तात्काळ निधी उपलब्ध करून द्यावा,  ज्या ठिकाणी अद्याप मुलींसाठी स्वतंत्र स्वच्छतागृह नाही, तेथे तात्काळ नवीन स्वच्छतागृह उपलब्ध करून देण्याची विनंती निवेदनात करण्यात आली आहे, अशी माहिती संजय केळकर यांनी दिली.राज्यभरातील शाळांना गेली 4-5 वर्षे  अनुदान मिळालेले नाही, त्यामुळे शालेय खर्च भागवताना शिक्षकांना असंख्य अडचणींचा सामना करावा लागत आहे. हे अनुदान सर्व शाळांच्या खात्यावर तात्काळ वर्ग करावे, अशी मागणी करण्यात आली. राज्यभरात जिल्हा परिषद शाळांमध्ये व प्रशासनात सद्यस्थितीत गटशिक्षणाधिकारी, विस्तार अधिकारी, केंद्रीय प्रमुख, पदोन्नती मुख्याध्यापक, पदवीधर शिक्षक, विषय शिक्षक ही पदे रिक्त असून ती तात्काळ भरण्यात यावीत तसेच विषय शिक्षकांना पदवीधर शिक्षकांची वेतनश्रेणी तात्काळ लागु करण्याचा मुद्दाही यावेळी लावून धरण्यात आला. शेलार यांनी सर्व प्रश्न लवकरात लवकर मार्गी लावण्याचे आश्वासन शिष्टमंडळास दिले. 

शिष्टमंडळात महाराष्ट्र राज्य शिक्षक परिषद प्राथमिक विभागाचे संस्थापक अध्यक्ष आमदार संजय केळकर, राज्याध्यक्ष राजेश सुर्वे, राज्य कार्यालयीन मंत्री  भगवान घरत, रायगड जिल्हा कार्याध्यक्ष उदय गायकवाड आदी पदाधिकारी होते.
प्राथमिक शिक्षकांचे प्रश्न लवकरच मार्गी, शालेयमंत्री आशिष शेलार यांचे आश्वासन प्राथमिक शिक्षकांचे प्रश्न लवकरच मार्गी, शालेयमंत्री आशिष शेलार यांचे आश्वासन Reviewed by News1 Marathi on July 01, 2019 Rating: 5

No comments

Featured Post

नेक्स्ट एज्युकेशनचे स्मार्ट लर्निंग अॅप 'लर्ननेक्स्ट+'

  ■विद्यार्थ्यांचे वैयक्तिकृत शिक्षण अधिक मजबूत केले... मुंबई, १ डिसेंबर २०२० :  प्रत्येक विद्यार्थ्याला सर्वंकष सेल्फ-लर्निंग अनुभव सुलभ कर...

Post AD

home ads