पाकला दणका देणारे सामंत गोयल नवे रॉ प्रमुख; IBची सूत्रे अरविंद कुमारांकडे

 न्यूज१ मराठी । नेटवर्क 

उरीनंतरचा सर्जिकल स्ट्राइक आणि बालाकोट हवाई हल्ल्याची अचूक व यशस्वी योजना आखून पाकिस्तानला दणका देणारे सामंत गोयल यांची 'रॉ' (रिसर्च अँड अॅनालिसिस विंग)च्या प्रमुखपदी नियुक्ती करण्यात आली आहे. तर, जम्मू काश्मीर विषयातील तज्ञ मानले जाणारे अरविंद कुमार यांच्याकडं आयबीच्या संचालकपदाची जबाबदारी सोपवण्यात आली आहे. पंतप्रधान नरेंद्र मोदी यांच्या अध्यक्षतेखालील समितीने या दोघांची निवड केली असून लवकरच हे आपला पदभार स्वीकारणार आहेत.

सामंत गोयल यांनी बालाकोट हवाई हल्ल्याची आखणी आणि नियोजन केलं होतं. तर अरविंद कुमार हे आसाम-मेघालय केडरचे आयपीएस अधिकारी असून अनेक वर्षांपासून आयबीसाठी ते काम करत आहेत. देशातील नक्षलवादाला वेसण घालण्यात त्यांनी मोलाची भूमिका बजावली आहे. 'रॉ' ही शत्रूराष्ट्रांच्या कारवायांवर लक्ष ठेवणारी गुप्तहेर संस्था आहे तर देशांतर्गत हिंसाचार, देशविरोधी कारवायांवर करडी नजर ठेवण्याची जबाबदारी 'आयबी'वर आहे.

कोण आहे सामंत गोयल

-१९८४ बॅचचे आयपीएस अधिकारी
- ६ वर्षं पंजाब केडरमध्ये काम केलं
-पंजाबमधील फुटीरतावादाला आळा घालण्यात महत्त्वपूर्ण भूमिका बजावली
- बराच काळ पंजाब पोलीस साठी काम केल्यानंतर २०००१ रोजी रॉमध्ये निवड
-रॉच्या अनेक योजनांची आखणी केली
-एअर स्ट्राइक आणि सर्जिकल स्ट्राइक्सची आखणी केली
- पाकिस्तान विषयातील तज्ञ अधिकारी
- शांत, संयमी आणि अत्यंत इमानदार पोलीस ऑफिसर अशी प्रतिमा


कोण आहेत अरविंद कुमार ?
-१९८४ बॅचचे आसाम-मेघालय केडरचे आयपीएस अधिकारी
-काही वर्षं आसाममध्ये काम केल्यानंतर आयबीमध्ये निवड
- नक्षलवादाविरोधात मोठ्या प्रमाणात काम
- जम्मू-काश्मीर विषयातील तज्ञ, काश्मीरमधील गुप्तहेर यंत्रणा त्यांच्या आखत्यारित
- काश्मीरमध्ये सरकारची दहशतवादविरोधी धोरणं राबवली.



.